NI

EGOITZ AIZPURU

DOINUA: ETA-REN SU ETENETIK

 

1.

Inor ez denez jaiotzen

eskuliburu ta guzti,

ez dugunez bereizten zer

dagoen ondo, zer gaizki,

autolaguntza liburuz

hornitu dute Eroski,

arima salbatzaileez

ta psikologoz Donosti.

Bi hankako orojale,

hegamotz eta narrasti

jaio nintzen, zuzentzeko

egonik denbora aski,

une honetan naizena

izateko seguraski.

 

2.

Epaile bat naiz egunez

dena da nere jomuga:

Skinetoen Martensak,

gotikoen Sepultura,

motorzaleen Alonso,

“Todo Incluido”-en Cuba,

elkar maitatzen ez duten

ezkonduen sinadura,

bertako kultura eza

ta etorkinen kultura…

Oheratzean biktima

bakarra daukat eskura

beste denak kritikatzen

libre ibili den hura.

 

3.

“Ni ere banaiz Ketxua,

Aimara ta Berebere!”,

nahiz eta ez dakidan non

bizi diren ziur ere…

Ezkerreko iraultzaile

etiketa hain dut nire!

Ez naiz, ustez, eskuindarra.

Ez polizi, ez errege.

Gorroto ditut hainbeste

bortxa, indar eta lege;

herri txiki zapalduen

askatasuna dut xede.

Agian ez dudalako

haiek adina botere.

 

4.

Ahalik eta gogorrena

gustatzen zait rockanrola;

ia bihotzeko batek

emateraino futbola.

Beldurrezko pelikulak,

biolentzia, odola…

Bolantean arriskua

abiadura, kontrola.

Ostegunez, marihuana;

Ostiralean, alkohola;

larunbatez bietatik,

igandean Cocacola…

Ta bitartean gibela

behazuna dariola.

 

5.

Inoiz ez dut eguzkitan

balkoi batean gosaldu,

pintxo poteo batean

ez dut denborarik galdu,

inoiz ez dut jokaera

samurregia azaldu

urtebetetze egunak

ta urtezahar gaua salbu,

inoiz ez dut guapoago

sentitu asmoz argaldu.

Definitzen naizen arren

libre, alai eta malgu,

honek sufrimendu baten

usai gehiago ez al du?

 

6.

Kaleetan zenbat txakur

bankuan zenbat banpiro,

gezi hilkor pozoituak

jaurtitzen dabil Kupido.

Amorrua espresatu

dezaket behin ta berriro

nere ahoan tontortu

arte mila adjetibo.

Eskuetan bi pistola

gerrian hiru latigo

munstro baten heriotza

desio dudan aldiro

nere munstroak neroni

ere egiten dit tiro.

 

7.

Zaldiak dauzkat etxean

zaleak nere pentsura.

Izena daukate Poza,

Barkamen, Beldur, Tristura,

Jeloskor, Harroputz, Muxu,

Antsietate, Arrangura,

Besarkada, Nagi, Gozo

Gogaikarri eta Guda.

Goizero goizero daukat

aukeratzeko ardura

zein zaldiren bizkarrean

irtengo naizen mundura.

Horren araberakoa

izango da abentura.

 

8.

Deabru astun xamarrak

daramatzat petatean,

deskuidatzen naizenero

jartzen nautenak jakean,

eta ezin ditudanak

ezkutatu hankapean,

nirekin egongo dira

bizirik naizen artean.

Baina deabru zaharrei

arnasik ez ematean,

indar gabe ez dakite

nola jardun atakean.

Buztana ezkutatu ta

lagatzen naute bakean.