Erasmuseko ikasleak –
Doinua: Azken arnasa eman nahi nuke
Zerbait atzean utzi ohi dugu
erabakiak hartzean
eta atzerrira joan ohi gara
ardi galduen antzean.
Herri berria, etxe berria
lagun berriak klasean.
Nahiz herrimina izan batzutan
zein triste egon lantzean,
holako gauzak ez dira egiten
Gazteetan egin ezean.
Gaztetasuna ta abentura
doaz elkarren eskutik,
gauak luzeak, zerbeza merke
ostean klasean zutik.
Nahiz eta sarri dirua atera
behar ez dauen lekutik,
bidaia hasi eta pozarren
gaude guztiok ordutik.
Ordua ahaztu ta egin dezagun
Sortzen zaiguna barrutik!
Eskutik kendu dugu erlojua,
ez dakigu zer den prisa
eta egun denak dira politak
nahiz eta eguraldia grisa.
Baina biziraun ere egin behar
eta ikasten gabiltza,
gurasorik ez, beraz, hau da hau…
bazkalorduko ekaitza!
Egia esan ez da hain txarra
kongelatutako pizza.
Ez da erreza denok lortzea
egotea hain gustura,
jende berria ezagutzean
norbere beldurren muga
“Gustoko al naute talde barruan?”
nabarmendu ohi da duda.
Bizi estilo, pertsona anitz,
hamaika mila kultura,
ezjakintasun horretan ere
topa leike abentura
Jakin nahi nuke gure bidaia
hasita orain ta hemen
noiz edota non bukatuko den
edota bukatuko den
hemendik eta urte betera
zertan bihurtuko garen
Jakin nahi nuke jakin ahal bada
ze aldaketa, ze garapen
bihar etzi nor izango garen
edo eta nor ginen lehen
