Etxeko etartetik

Enare Muniategi

Enare Muniategi

2018-03-28

Etxeko etartetik –

Doinua: Loriak udan

Etartetik ikusi dezaket

udaberria kantari,

eguzki izpi goxoak eta

lurrean txiribita bi.

Esateko dut horrenbeste ta

begiratuz munduari

etxekoei zein txakurrari

edo landa berdeari.

Esateko dut horrenbeste ta

begiratuz munduari,

nori kantatu ez dakit eta

beraz neure buruari.

 

Bakardadean eta aurrean

hainbeste paraje eder,

holakoetan pentsatzen jarri

pentsatu leike edozer.

Nahiz ta gaztea izan oraindik

ez dut erabaki ezer

geure burua presionatuta

dugun egoerari “esker”.

Nahiz ta gaztea izan oraindik

ez dut erabaki ezer,

ez dut egin, halan be badakit

etorriko dala laster.

 

Tokatzen dena tokatuko da

baina ez pentsatzea hoba

horretarako asmatu zuten

antzina eta denbora.

Udaberria heldu da eta

uda ere helduko da,

kejatzea ta arduratzea

hau da hau dugun ganora!

Udaberria heldu da eta

uda ere helduko da,

bien bitartean nire etxeko

etartean nau gustora.

 

Etartetik irten gabe ere

badakit zer den duguna.

Instagram denontzat ezaguna,

mundua ezezaguna.

Pantaila aurrean ta lanean

pasa ohi dugu eguna,

horrela zelan ez da izango

gure bizitza iluna?

Pantaila aurrean ta lanean

pasa ohi dugu eguna,

ahaztu ohi dugu ze ederra dan

gure aurrean daukaguna.