Hurrengo Bertsolari Txapelketa Nagusia 2022an, eta finala Iruñean

Hurrengo Bertsolari Txapelketa Nagusia 2022an –

Pandemiak eragindako egoera leundu den honetan, lurraldeetako txapelketak ahalik eta normaltasun handienarekin bururaino eramateko modua izango dela aurreikusiz, 2022ko udazkenean Bertsolari Txapelketa Nagusiaren 18. edizioa aurrera eramateko erabakia hartu duela jakinarazi du Bertsozale Elkarteak.
 
Hurrengo Bertsolari Txapelketa Nagusia 2022an
 

Txapelketa Getxon hasiko da irailaren 24an eta Euskal Herri osoan zehar jokatuko dira kanporaketak. Finala Iruñean izango da, abenduaren 18an.

Bertsozale Elkarteak aditzera eman duenez, “ibiltaria da Bertsolari Txapelketa Nagusia. Euskal Herrian zehar, herrialdez herrialde, herriz herri, eragitea eta bertsolaritza sustatzea da Bertsozale Elkartearen helburua. Ondorioak nabariak izan ohi dira: zaletasuna areagotzen da, bertso-eskolentzat bizigarri dira eta ilusio piztaile da tokian tokiko bertsogintzan. Xede horrekin eta Iruñean Nafarroa Arenak Bertsolari Txapelketa Nagusiaren finalerako beharrezkoak diren azpiegiturak eskaintzen dituela aztertu ondoren, Bertsozale Elkarteak finala bertan egiteko erabakia hartu du”.

Finala Iruñean izateak Iruñerrian eragitea du asmoetako bat. Ez da asmo isolatua, Nafarroan bertsolaritza sustatzeko ahalegin handia egin du Nafarroako Bertsozale Elkarteak 1984. urtetik. Horren ondorio da, besteak beste, Nafarroako Gobernuak 2018an bertsolaritza Kultur Intereseko Ondasun izendatu izana.

2005. urtean, Donostiatik Barakaldora

Hurrengoa, Euskal Herriko Bertsozale Elkarteak, 1987an sortu zenetik, antolatzen duen Bertsolari Txapelketa Nagusiaren hamargarren edizioa izango da. Elkarteak txapelketaren ibilbidea bildu du

Txapelketaren finalak Donostian errotuta egotetik (1935-2001), beste lurralde batean eragin asmoz, finala Barakaldoko Bilbao Exhibition Centren egitea erabaki zuen Bertsozale Elkarteak 2005.urtean.

Ohiko plazak, lehentasun

“Ohiko bertso plaza berreskuratzea da bertsolaritzaren mugimenduaren asmo nagusia une honetan”, jakinarazi dute antolakuntzatik. Egun abian diren lurraldeetako txapelketak hasieratik amaieraraino ahalik eta normaltasun handienarekin gauzatzeko eta Bertsolari Txapelketa Nagusiaren antolakuntzan ilusioz eta buru belarri ari da elkartea.

Bertsozale Elkarteak eskerrak eman nahi izan dizkie “1987tik gaurdaino txapelketen edo bestelako egitasmoen bitartez, bertsolaritza sustatzen eta eragiten lankide izan ditugun norbanakoei, bertso-eskolei, elkarteei eta erakundeei”.

 

Gontzal Agote, Euskal Herriko Bertsozale Elkarteko Lehendakaritza Taldeko kidearen adierazpenak

 

Hurrengo Bertsolari Txapelketa Nagusia 2022an