Bertso jarriak hitanoari, hikaz

Eli Pagola-(r)en argazkia Eli Pagola 2019-09-20

Bertso jarriak hitanoari, hikaz-

Doinua: dozena bat bertso berri 

 

Bertso jarriak hitanoari hikaz 

 

Argi ibil hadi zeren

irakurle gisa hemen

hire moduko sasi-jakintsu

asko xamar zeuden.

Egun on, Eli, dena den

galdera ezer baino lehen:

hik hikaz zerbait badakin baino

erabiltzen al den?

 

Kaixo Pagola, Hiri’re!

Zemuz habil, adiskide?

lehendabizi hika ta zuka

ez zeuden bi bide.

Biak izanik posible

egin nahi dizkinat nire

baina burua eta mingaina

behar ditun libre.

 

Mantentzeko hire onra

epelkeri denak sobra

lasai, hi ere jarriko haiz ni

bezain egoskorra.

Guztia den sailkakorra

zerk nor egiten haun horra

batek euskaldun eta besteak

euskaldun jatorra

 

Nahiz denak ez izan berdin

ezin den askorik egin

hire ustera ekarritako

aditz taularekin.

Lagun behar huke jakin

jatorrerako hikak din

baserritarrez janzteak duen

adina eragin.

 

Poto egiteko tranpan,

edo ta eduki faltan

bertsolaria maiz egoten den

halako atakan,

bertso/errima arautan

imajinatu nahi haut han

hika formik ez ditenekiko

abantaila daukan.

 

Sartuz lau aditz arraro

gero ta aberatsago

izango dela nire bertsoa

sinetsita hago.

“Dizkiñat’-ka ahoz aho

hasi ezkero akabo

hasieran bai exotikoa,

gero bat gehiago.

 

Bere bitar politikak

sortutako polemikak

ez ditun soilik hizketarako

aitzaki polit bat

ta errima dinamikak

izan ezean taktikak

hiri zergatik ta zertarako

balio din hikak?

 

Bazeukan zer aldatua

subjetu eta tratua

horrexegatik egiten diñat

aldeko hautua.

Nahi bezela moldatua

ta ez fosilizatua

eskuragarri, geurea eta

eguneratua.

 

Bertso jarriak hitanoari, hikaz