Haizetakoa –
Doinua: “Esaminatu izanttut ongi / Basetxe eder maitagarria”
Vladimirrena, Kubako puru
usainari erantsita,
abesten hasi denean Ruper,
trostaka, erdi antsika,
agertuko da jarri baitugu
hotel gibelean zita;
ordu txikitan, zerbitzu-atean,
haxix usainez jantzita.
Modu onean amaitzekotan
bizi duen errutina
irabazleaz mozorrotzen du
galtzailearen arima.
Erran izan dit jaitsi orduko
gaueko adrenalina
biziki triste amaitzen dela
Thelma eta Louise filma.
— Gaur zuzenean etxera niek.
Ez serio, ez xelebre
erran dit eta nabaritu dut
munduarekin haserre.
Tabakoari su eman nahian
jarraitu du odolerre…
— Nik baino askoz hobeki dakin
hemen ezin dela erre.
— Hi lasai izan, alibi bila
hartuko gaitik hiriak,
ui, nahi gabean sua hartu dik
tabakoaren ziriak!
Gaurkoz, mesedez, alde batera
utzi itzak intziriak.
Ezin nauk hire lekuan jarri
nireakin aski diat!
Lokatz nabarren artetik ihes
nahi zuena argitara,
iganarazi nahi izan zuten,
beste ainitzen gisara,
iraganeko errautsetatik
hautsitako panpinara.
Bihotz zintzo bat gangrenatzeko
zenbat hitz gaizto behar da?
Ezbai andana ezkutatzen da
askatu gabeko ixan.
— Iritsi gaitun. Bidaia lasai
joan dun, edozein gisan,
aholku bat dun; deskantsurako
tartetxoak hartu itzan!
Eskudirutan ala txartelaz? (…)
Mila esker, ongi izan.
