Abuztuaren hirua –
Doinua: Gure herri ttiki hau da (6 puntukoa)
Abuztuaren hirua
beratarrotzat kuttuna.
Besten egun nagusia
den San Esteban eguna.
Beti ez da hala izan,
begiratuaz hurruna
hogeita hamaseikoa
ze gertaera iluna.
Hamarkadaz isildua
ta guztiz ezezaguna:
A(ha)zteko modukoa ta
a(ha)ntzi behar ez duguna (ber)
Apenas hamabortz egun
le(he)nago hasi zen guda.
indar frankistak hurbildu
ziren Bera ingurura.
Emakumeak,umeak,
edo gorria zen hura,
herriko plazara deitu
zituzten, eta ingura.:
Hiru aukera eskeini
zieten bide modura:
Gipuzkoara, Frantziara
edo fusilamendura (ber)
Solchaga koronelaren
agindua nola bare?
denek ere egin zuten
biziraupenaren alde.
Iheslarien senide,
ume, zahar zein nerabe
kamioietan sar arazi
eta sorterritik alde.
Ehundaka beratar izan
ziren, aginduen jabe
herria utzi zutenak
beraiek nahi izan gabe(ber).
Bortxaz deserriratuak
egun hartako ekintzan,
zuten guztia utzi ta
traba berri bat bizitzan.
Senide(e)n berririk gabe
egoeraren peskisan
Kezka eta herri mina.
(bat nahikoa ez bailitzan!)
Nahiz batzuk bueltan etorri
gauza baretu zen gisan,
bertze aunitzek ez zuten
inoiz itzultzerik izan (ber)
Ta herria militarrek
zutelarik okupatu
haien alde egitea,
gelditu zirenen patu.
Baina salaketa bidez
zabalduz hamaika datu,
aunitz jazarri zituzten,
bertze aunitz fusilatu.
Bederatzi hamarkada
luze zaizkigu pasatu
ta oraindik barkamenik
inork ez die eskatu (ber)
Gaizki ikusiak zeudenak
haien ustezko ongian,
herria utzi zutenak
sasoi gazte ta jorian,
Fusilatu zituztenak
Argaitzeko harrobian,
ta orain atseden hartu
hilerriko hilobian,
galtzailetzat izendatu
dituztenak historian,…
luzaroan bizi bitez
herritarron memorian
