Iñigo Legorburuk irabazi du Florentino Goiburu bertso paper lehiaketa
Lehenengo saria ‘Influ-ezer’ bertso sortarekin lortu du eta bigarrena, ‘Esan gabe doa’ lanarekin.
Iñigo Legorburuk irabazi du Florentino Goiburu bertso paper lehiaketa –
San Blas jaiak ospatzen aritu da Idiazabal, eta testuinguru horretan eman dituzte jakitera I.Florentino Goiburu bertso-paper lehiaketako irabazleak herriko plazan. Helduen mailako lehen eta bigarren saria Iñigo Legorburuk eraman ditu Influ-ezer eta Esan gabe doa lanengatik.
Lehiaketa, Idiazabalgo bertsozale taldeak eta Illati euskara elkarteak antolatu dute, eta aurtengoa izan da lehen edizioa. Sariketa ez da asko zabaldu, eta gazteen mailan ez da lanik aurkeztu; helduetan, berriz, 11 bertso-sorta aurkeztu dira. Arauek hala aginduta, bertso-sorta guztiek 6 bertsoko luzeera eduki behar zuten.
Lehenengo sarian Influ-ezer lanaren bidez, Legorbururen hitzetan «hain balio erraz eta eskasetan oinarritutako influezerrak kritikatu nahi izan ditut. Izan ere, konturatua nago pantailek eta internetek gurasoongan sortzen dituzten kezkak eta nik ere nire aletxoa jarri nahi izan dut kezka horretan». Lanarengatik 300 euroko saria eta egurrezko garaikurra jaso zituen.
Bigarren sariarekin, Esan gabe doa lanean emakumezko baten ezinegonak eta urduritasunak agertzen saiatu da «oholtzara hitz egitera atera behar duen neskato gazte baten azalean jarrita, non genero rolek zeharkatzen duten». Azken bertsoan ordea, sorpresa bat dago eta neskak zeinu bidezko hizkuntzan jardun behar duela agerian geldituko da. Bere lanarengatik 100 euro eta Idiazabalgo gazta bat jaso zituen.
Aloña Galarraga izan zen idiazabaltarrik onena eta hark ere saria jaso zuen Zintzarri hotsez izeneko sortarengatik. Florentino Goibururen biografia errepasatu zuen.
INFLU-EZER
DOINUA: Gure lurrean hedatua da
Kaixo, ni Mega Johann nauzue
atzo nintzena Joanes
jarraitzen nauten haiekin bete
ditzaket mila San Mames.
Trukatzean bizi-planez,
gaur nabil amets buhamez
frikia zena ikono berri
bihurtu baita, aidanez …
Filtrorik gabe esanez:
“Ez segi loser izanez!”
Zuek niretzat jardun zaitezten
aldatu berri dut lanez. (BIS)
Mundura jartzen gaitu begira
gure jardun urduriak
txunditzen gaitu reggetoi txarrak
edo Brasilgo cumbiak.
Dantzari sexy, guriak
erakutsiz ipurdiak
“probintzianismoz ez zaitez jantzi!”
diolako liturgiak …
Nazka Rahm-ek, Ezkurdiak
Xibero ta Lapurdi at
Euskal Herria alferrik dauka
guretzat mapa-mundiak. (BIS)
Txutxumutxutan hasitakoan
iristen gara Cuore-ra
gure begiak eginda daude
matxismoaren moldera:
“Neskek, kiloak sobera”
“Aiton galaiek, hobera”
haien bizitzek ze arrakasta
igotakoan blogera!
Aniztasun kolorera
apusturik ez morera!
Mikromatxismoz osatu ahala
suntsitu dadin norbera … (BIS)
Obsesionatzen gaitu erabat
eskalan gora jotzeak
gogoz onartzen ditugu hortaz
tribuko kode mortseak:
Urre gorrizko brotxeak,
zilarrak edo brontzeak
ai, hainbeste lan dakar berekin
espektatibak sortzeak!
Gama altuko kotxeak
BMW ta Porscheak
askatasuna ematen digu
kapitalari lotzeak. (BIS)
Garai bateko elizetako
pulpitoak zeuden goian
Jesukristoren hitza hartzeko
bazen nahiko arrazoi, han.
Mugikorraren sasoian
herriko kale kantoian
edonor bihur liteke laster
gure otoitzen morroian …
Hain tonu aurrerakoian
sartzen diegun pozoian
gaur burumakur umiltzen dira
telefonoko sermoian. (BIS)
Indarra hartzen dihardu gure
influezerron lobby-ak
baina elite deitzen den hortan
badira kategoriak:
Story hot ta goriak,
reggetoizko melodiak
garun txokotan sailkatzen ditu
norberaren memoriak.
Horren ahalegin joriak
baietz eskertu zoriak!
Historiara pasa daitezen
gure gaurko story-ak! (BIS)
ESAN GABE DOA
DOINUA: Ke azpitik, su gainetik
Gelako isilena zen
neska hura parkean
gaur ez dago bakean
publikoan jarduteko
lantxo bat bapatean
baitu eskuartean …
Atzo izan nintzen haurrak
hor dirau itzalpean
hitzik ez aldartean
mututasuna gorpuzten
hasten den bitartean. (BIS)
“Oholtzara igo orduko
baietz jaso epaia!”,
“lotsa, zure etsaia”
halako mezu gogorrek
handitzean ezbaia
ximeltzen zait bisaia.
Atrebentzia ez al da
akatsaren anaia?
Hasterako … amaia!
Gauza bat da esanahia,
bestea esan nahia … (BIS)
Ondotxo dakigun arren
ez garela hitz hutsak
hurkoaren hizkuntzak
sarri bilakatzen gaitu
tentelak, harroputzak
ukituz bihotz zuntzak …
“Pertsonak gorputzak gara!”
Dion arren hezkuntzak
ahazten zaizkigu funtsak …
Beraz zergatik mututzen
dira gure gorputzak? (BIS)
Bizitzak gu isiltzeko
badituenez planak
jartzen ditu afanak
gure baitan betirako
sarri utziz aztarnak
ta zuzentzen, ze lanak!
Ez al dira bertikalak
munduko harremanak?
Ze pisu, iraganak:
Esanekoak izanda,
ahazteraino esanak! (BIS)
Izua eragiten dit
jendaurrean hasteak
hitz hutsekin janzteak
nirea ez den rol batez
lagunei itsasteak
ta buru eskasteak.
Beldurtzen nau plazandreen
kodeak ikasteak
nolako kontrasteak
librean jardunagatik
ez baikara askeak. (BIS)
Aurretik asko prestatu
naizenaren bermean
adinik onenean
aurkitzen naizela ongi
dakit nik azkenean
lanaren izenean!
Gurasoen begirada
nabari dut erne han,
ze poza barrenean!
Zeinu hizkuntzan hizketan
ikusten nautenean! (BIS)
