[BERTSO KANTARI II] Araitz, Maddi eta Urko: Ke beltza gure inguruan
Ke beltza gure inguruan –
Bertsolari aldizkariaren 30. urteurrenaren karietara antolatu genuen gure lehen bertso idatzi lehiaketa. 14 urtetik behekoen kategorian Lasarteko bertso eskolako talde batek irabazi zuen lehen saria “Ke beltza gure inguruan” bertso sortarekin: Araitz Ramos, Maddi Lasa eta Urko Ormazabal. Oskar Estangak haien lana musikatu du.
Zorionak hiruei, aupa zuek!
Munstro berri bat eraiki zuten
gaiztoa bezain garratza
dagoeneko eten duena
herri on baten arnasa.
Ingurukoak isilaraziz
egin zuten euren kasa,
ostu zieten herritarrei
zuten botere eskasa.
Erraustegiak handitu zuen
intzidentziaren tasa,
orain airean barrena dabil
gure zaborraren gasa.
Eskolan bertan eraiki zuten
baldintza txarregietan
etxe ondoan nahi ez zutena
ipiniz gure lurretan.
Ezin da lore berririk jaio
tristuraren errautsetan
eta zaharrak itota daude
ezintasun malkoetan.
Gure indarrak xahutu dira
jada borroka honetan,
eskola belztu zigutenetik
deabruan itzaletan.
Ustelkeria hustu ezean
itzaliko da argia
ez daigun a(ha)ztu hor dagoela
bailara honen zoria;
batu gaitezen sendatzekotan
sortu diguten zauria,
hau baita euskal gizartearen
aurkako hondamendia
ta laino beltzek ez estaltzeko
herriaren memoria
esku bietan eutsi dezagun
geroaren miraria.
