Oroitzapenaren bidetik

Oroitzapenaren bidetik –

Doinua: Ausencia (Imanol) 11ª-11B-ra egokitua

 

Oroitzapenaren bidetik

 

Bi mila ta hogeiko martxoak lau

goizaldeko hiru t’erdiak bueltan,

lagunekin juerga batetik bueltan

niri gertatu zitzaidana da hau.

Gau hark ere oraindik ilun dirau

Usansolo pareko errebueltan

eta han geunden denon buruetan,

non bide lauak ez diren bide lau!

Kontzientzia moralen artisau

bat baino ez naiz odolbilduetan.

Hil ziren bi lagunen doluetan

denbora berak geldiarazi nau.

 

Begiak zabaldu nituenean

argi urdin batek itxi zizkidan!

Berriz zabaldu nituen segidan,

imajinatu! Istripu-gunean…

Non zauden ere ez dakizunean

eta bi lagun-hilotz zure giran…

Betirako hiltzatu zitzaizkidan

segundo hoiek etorkizunean.

Hau gainditu beharko nukenean

eta lor nezakenaren desiran,

hau dena errepikatzen da nigan

begiak ixten ditudan unean.

 

 

Oroitzapenek negarra dakarte

eta malkoa hedatzen ari da

nigandik nire inguru guztira,

non ni naizen dugun minaren parte!

Maiz ez dut ez poz eta ez aldarte,

baina joan ziren biei begira

zerbait dator nire bihotz erdira

eurak baitira nire estandarte.

Nahiz eta egon gugandik aparte,

nahiz eta joan ziren urrutira,

nire bihotzean biziko dira

bihotzak ematen didan bitarte.

 

Urko Egaña

Oroitzapenaren bidetik