Mairulegorreta –
Doinua: Nigarra begian (Xalbador)
Ertzak josi zituen
Ahizpa eroria
Odolaren mintzoa
Nahiz den minoria
Dinamitak zabaldu
Oi du harrobia
Horrelakoxea da
Gure historia
Mila bederatziehun
Ta hirurogei bueltan
Euskal Herria ez zen
Bat bere ertzetan
Nahiz Xalbadorri txistu
Egin Anoetan
Txaloka ari ziren
Mairulegorretan
Euskara galdua zen
Bien bitartean
Arabako lurretan
Gorbeiako harpean
Mingainean ezin ta
Motxila batean
Txinparta sartu zuten
Infernuko atean
Letra ulertezinak
Buruz ikasiak
Estalaktitapeko
Dantzak- garraixiak
Nahiz irteeran gertu
Egon poliziak
Araba ernaldu zuen
Ezkutuko haziak
Euskarazko sortzaile
Arabarrontzako
Mairu “Meka” da hortik
Nor ez zen pasako?
Behin “Murua” harrobi
Bihurtu zutelako
Kanta dezakegu guk
Eta eskerrik asko!
…
Gure seme-alabei
Argi utzi beharko
Izan daitezkeela
Izan zirelako!
