Bertso berriak alaba sorginenari jarriak –
Doinua: Zarauzkoa balearena
Gorantz egin ahala
urtearen mailak
hogeita bederatzi
baditu uztailak
zeinek jaso badauka
gaurko bertso-sailak
hauek Haizearentzat,
erraz edo zailak,
ea pixkat gorritzen
zaizkion masailak.
Nik ez diot zabaltzen
barrua edozeini
lotsaren partiketan
lehen filan nintzen ni
baina idatzi nion
behinola Maleni
ta zu haserretzerik
ez denez komeni
bihotzetik sorta hau
nahi dizut eskeini.
Bizi ta egoskorra
bezain atsegina
hamabi urteotan
bidea egina
etxean sartu zinen
bigarren sorgina
ederra litzateke
nahi dugun adina
biok erratz berean
joango bagina.
Baina hamabigarren
urtera sartzean
ume-garaia uzten
zabiltza atzean
fruituak heltzen doaz
gure baratzean
gauzak egin baditut
tajuzko antzean
lasai egizu hegan
zeure erratzean.
Gaur nerabe-haizetan
ikusten zaitut zu
garesti jarri dira
laztan eta musu
beste norbaitentzako
gorde al dituzu?
Zuk ere hazi eta
askatu gaituzu
baina aita ondoan
edukiko duzu.
Bi mila ta hamalauan
bizitzaren buelta
geroztik hor gabiltza
ahari-topeka
elkarri sarri belzten
diogu kopeta
baina bihotza ez zaizu
barruan sartzen ta
nirea ere harro
ari da kolpeka.
Ez zintudan eduki
nire gorputzean
baina zilbor-heste bat
badugu, motzean,
ezin dena ikusi
begiratu-hutsean.
Haizea, segi hegan
sorginen haizean
guri gerra ematen
denbora luzean.
Bertso berriak alaba sorginenari jarriak
