Euria behar zen, baina… –
Doinua: Markesaren alaba
Ez zenean iritsi
gurera resaka
Larunbat arratsean…
euriaz kexaka…
berant heldu zen baina
heltzean presaka
tristuraz busti ditu
Bera ta Lesaka
Euri tantarik ez zen
aspaldi ikusi
egoera zaila zen
lehorte ta guzi
Baina natura denez
gurean nagusi
batzuek hainbertze ta
bertzeek zein gutxi
Ekaitza noiz datorren
ez denez jakiten
Ur oldea etxeetan
eta ezin irten
Hanka hoztuak eta
odola irakiten
denon gustura ez du
euririk egiten
Natura haserretzean
nor dago seguru?
Beldurra ta ezina
biak buruz buru
Uraren altuera
bi metro inguru
desira genuen hark
ia ito gaitu gu
Baina genbiltzanean
guztiok penetan
Herritarra azaldu zen
eremu denetan
Nolakoa ote den
jendea benetan
soilik ikus daiteke
une zailenetan
Batetikan lur jauzi
trumoi ta ekaitza
Bertzetikan laguntza
ta elkarren zaintza
Gaitza ez da izaten
hainbertzeko gaitza
elkartasuna bada
bere azken emaitza
Herrikideak badu
arazo larria
auzolana ez dugu
erantzun berria
Borondate guztia
laguntzen jarria
herriak soilik salba
dezake herria
Uholde, sufrimendu
ta ezina aurrena
Elkartasun oldea
zetorren hurrena
busti ohi den jendarte
baten aztarrena
Urak eramaten du
urak dakarrena
