Inaxi Etxaberi

Kudeatzailea Bertsolari Aldizkaria

Kudeatzailea Bertsolari Aldizkaria

2020-07-22
Inaxi Etxaberi

Inaxi Etxabe bertsolaria Gipuzkoako txapelketan

 

                                                                                                                                       INAXI ETXABERI-

INAXI ETXABERI

 

Doinua: Izar azpian zerua dago

 

Bertso jarriak, publikatuak,

edo josi ahala bota

halabeharrez egin zenuen

mila bidezidor mota

nik aurrez aurre entzun zintudan

Ilunben oholtzan igota

berandu jaso dugun ondare

honi lotuz gure soka

gure agurren kantu-premia

zuk emanetik dator ta

kolektiboan osatuko da

zure azken bertso sorta

 

Ardo bidetan libratzen ziren

orduko hitz-neurtu gudak

ta ez zintuen bertan onartzen

andre finaren figurak.

Baina bidea aurkitzen baitu

jario libreko urak

zirrikitu bat egin zenuen

tantaka zartatuz mugak

zure ahotsak zabaldu zigun

nahiz ez onetsi ohiturak

emakumeoi bertso mundua

ta bertsoari mundu bat

 

Zure burua altxatzearren 

Basarriri parez pare

‘erantzun zion emakumea’ 

bihurtu zinen halare

bai baitzinen nor lehenago ere

ta hari erantzun gabe

desio dugu zure emana

bilakatzea ondare

izan zaitezen lehendik zor zaizun

miresmen txaloen jabe

bertsolaritzak oroituko du

nor zen Inaxi Etxabe

 

                                                                                                                                                                                                                               Inaxi Etxaberi-