Medikuen kontuak

Felix Zubia

Felix Zubia

2020-09-04

Medikuen kontuak-

Doinua: Norteko ferrokarrila

 

 

1.Medikuaren ofizioa,

Hain handi, hain bedeinkatu,

Bizitzak daude jokoan eta

Serio beharko hartu.

Baina momentu barregarriak

Noizbait direnez gertatu,

Bertsotan jarri eta bilduta

Nahi nizkizuen kontatu.

 

2.Hau Zumaiako aitonatxoa,

Don Juanengana joana,

Eguneroko lagun zituen

Zigarro eta edana.

“Utzi guztiak derrepentean”

Medikuaren esana,

Baina ez dugu nolanahikoa

Gure aitona otzana.

 

3.Patrikan zuen metroa hartuz,

Mahaian jarri zuen, tinko,

“Begira Don Juan, esango dizut,

Nahiz naizen kontu gutxiko.

Zerotik hasiz, laurogeiraino,

Neurean egon naiz, kito,

Bukaerako muturragatik

Ez dut ezertxo utziko”.

 

 

4.Tolosakoa, Don Eustakio,

Benetan mediku fina,

Igande goizez tabernan zena,

Lanetik kanpo, jakina.

Gizon bat hortxe joan zitzaion,

Hori da eutsi ezina,

“Don Eustakio, nondik sortu da

Nire belauneko mina?”.

 

5.“Erantzi galtzak ikus dezadan”

Eustakiok  esan, hara,

“Hemen tabernan, denen aurrean”

Gizonak hori ikara.

Eustakiok, berriz, “Inuzentea,

Non galdetu didak, bada?

Bakean dena bakean utzi

Eta bihar  kontsultara”.

 

6. Azkena berriz, neuri pasea

Hasi  berria nintzela,

Gogoa nuen gainezka baina

Bajo xamarra nibela.

Emakume bat nuen parean,

Zorabio bat zuela,

Eta nik dena galdetu behar

Arauek esan bezela.

 

7.“Hartzen al duzu botikaren bat?”

Galde modu egokian,

Andreak hori hitz jarioa

Galderaren aitzakian.

Depresioa izan zuela,

Orain poza bekokian,

“Sexoral” hartuz  goizean goiztik

“Seroxat”aren tokian.

 

8.Mediku batek bizitzan hainbat

Tristura eta haserre,

Heriotzari, momentu txarrei,

egin behar die aurre.

Gertatzen dena, gertatzen dela,

Barrua zergatik erre,

Lehendabizikoz egin iezaiozu

Zure buruari barre.

Medikuen kontuak
Medikuen kontuak-