Rutinaren morroiak –
Doinua: Treneko koplak
Goizean goiz jeiki ta
gauez lotara
berriz ere itsatsi
zaigu izara
rutinaren morroiak
bihurtu gara.
Gure pizgarri hutsa
soldata bada
eguneroko lana
lantegia da
rutinaren morroiak
bihurtu gara.
Jatearen plazera
da platerkada
gutxikin aski baina
ze betekada
rutinaren morroiak
bihurtu gara.
Pantaila aitzinean
ordu ilara
inora zuzentzen ez
den begirada
rutinaren morroiak
bihurtu gara.
Astebururo berdin
egun zein gaba
dena planeatuta
daukagu jada
rutinaren morroiak
bihurtu gara.
Mendia zein hondartza
oporretara
Euskal Herritik urrun
edo bertara
rutinaren morroiak
bihurtu gara.
Eguneroko lege
da abiada
korrika ta presaka
hona ta hara
rutinaren morroiak
bihurtu gara.
Bizitzan honen funtsa
al da patxada?
Aldaketek nahiz sortu
beti ikara
rutina hausteko prest
egon behar gara!
