Tira sokari! –
Doinua: Gizona da zoroa
Martxoan iritsi da
Sokatiran txanda
Munduko txapelketak
kabi zun Irlanda
Horren jarraipena aski
txikia izan da
bertsoz egin nahi nuke
euren propaganda
Nahiz sokatirak dauzkan
makina bat urte
ezezagutzan sarri
hartu du arkupe
Merezi dun aitortza
izanen al luke
sokan ordez baloi bat
jarriko balute?
Nik neuk ere ipini
behar nuke gorri
ahanzturara auniztan
ditugu igorri
Nahiz munduko txapeldun
bezela etorri
non egin zaio leku
balentria horri?
Jardun arren talde ta
nazio gisara
ez titular nagusi
eta ez portada
Eta herri(ko) kirol
gisa dugu, hara!
Sarri gure etsairik
handienak gara
Gutxi azaltzen gara
nazio modura
Ikurrinen zirrara
dominen lilura
Kasu hontan sokaren
eskutik heldu da
Hau bultzatzea ez al da
guztion ardura?
Beti Gazte, Gaztedi
bikain dira ari
Badaiotz ta Ibarra
hor dabiltz aspaldi
Hamaika taldetako
hainbat tiralari
Nire eskertza bertan
ibili denari
Beti Gazte garaile
berriz ere aurten
Lesakarra naiz ta zer
poza eman didaten
Neska, mutil zein misto
zer lan, zer ekarpen!
Jarraitu ezazue
eredu izaten
Lanaren poderioz
indartsu ta arin
anitzak jaioterri,
sexu eta adin
Belaunaldi berritan
nahi bada eragin
segi gogoz tiratzen
soka eten ez dadin (bis)
