Turistak

Felix Zubia

Felix Zubia

2022-07-13

Turistak –

Doinua: asteburu aldera

 

San Juanak pasata,

gutxi gorabehera (bis),

kanpotarren taldeak

hor datoz gurera.

Herriaren mesede

omen da gainera,

baina noren mesede

hori da galdera,

neurria ipintzea

agian hobe da (bis).

 

Kotxea ezin dugu

inon aparkatu (bis),

tabernetan tokia

ondo borrokatu.

Ezagunen batekin

ezin gurutzatu,

hamar behar lukeena

hamabi pagatu,

oraindik bentajarik

ez diot topatu (bis).

 

Etxe bat topatzeko

ze atarramentu (bis),

lehen denda txiki zena

gaur apartamentu.

Alokairu guztien

prezioak lehertu,

aurrez gogorra zena

gehiago okertu,

herriko gazte asko

ez dago kontentu (bis).

 

Zabaldu dizkigute

hogei surf eskola (bis),

lau diskoteka norbait

zaindari dagola.

Euskarazko izenek

ez dute axola,

garai bateko Zarautz,

pentsatuaz hola,

zenbait tokitan ezin

aurkitu inola (bis).

 

Industria guztiak

dauka kutsadura (bis),

turismoa lantzen da

industria modura.

Prezioak, bultzadak,

zarata, basura,

dendak, etxebizitzak,

kaleen itxura,

sosak dauden artean

ez digu ardura (bis).

 

Gauzak ez lehertzeko

garaian gaudela (bis),

neurria topatzea

lehen erregela.

Gu ere bidaiari

besteak bezela,

ez dezagun ahaztu,

akabo bestela,

une hortan gu ere

turistak garela (bis).

Turistak