Ikerkuntza plana, Mintzolaren eskutik

2016-11-05

Ikerkuntza plana

Bertsozale Elkarteko Ikerkuntza sailak Bertsolaritzaren Ikerkuntzaren Plan Estrategikoa definitu du. Plan hau da Mintzolako Bertsolaritzaren Ikertegiaren oinarria.

Plan estrategiko hori garatzeko orduan, kultura mailako herri-eragile baten izaerari lotuago dagoen Ikerketa-Ekintza Parte-Hartzailearen (IEPH) metodologia erabiltzea aukeratu zuten bi helburu betetzeko asmoz: batetik, bertsolaritzan ikertu beharreko edukien eta lehentasunen definizioan zilegitasun gehiago lortzeko; eta bestetik, bertsolaritzari buruzko hausnarketara pertsona gehiagorengana hurbilarazteko.

Prozesuari buruz:

  • Euskal Herriko Unibertsitateko parte hartzeari buruzko aditu baten aholkularitza izan du: Zesar Martinez.
  • 2011 urtean hasi eta 2013an bukatu zen.
  • Euskal Herri osoan zehar zabaldu da: Herrialde guztietako Bertsozale Elkarteak eta bertsozaleak hartu dute parte.
  • 135 parte hartzaileekin egindako 23 tailer-bilkura egin dira.
  • 13 ikerlari elkarrizketatu eta jasotako edukiei buruzko iritzia eskatu zaie.
  • Edukiak Euskal Herri eta Herrialde mailako 17 langile eta 10 borondatezko taldekidek landu dituzte.  

Edukiari buruz:

  • 5 Lurraldeetako sintesietan: 130 ekarpen jaso dira.
  • Euskal Herri mailako sintesian: 73 proposamenetan laburtu dira.
  • 47 ikerketa proposamen, 10 ataletan banatuta.
  • 26 egitasmo-proposamen, bertsozale elkarteko 3 sailetan banatuta (sustapena, transmisioa eta ikerkuntza).
  • Proposamen bakoitzari egindako oharrez gain, beste 76 ohar jaso dira, atal bakoitzari dagozkionak eta orokorrak.
  • Lehentasunezko 11 ikerketa-proposamen zehaztu dira.

Prozesu parte hartzaile honen bidez batetik, 2013-2017 bitartean lehenetsitako eta garrantzitsutzat jotako ikerketez gain, beste hainbat ikerketa eta egitasmo egiteko proposamen-katalogoa osatu da.

Bertsozaleek lehenetsitako ikergaien ikerketa eragingo du Mintzolak, bere kabuz edo ikerkuntza-erakunde ezberdinen azpiegitura eta baliabideen bidez. Hauek dira Euskal Herri osoko eta orotariko bertsozaleek lehenetsitako ikergaiak:

Bertsozaletasuna – Gizartea:

1 – Bertsozaletzeko arrazoiak eta mekanismoak ikertu. Adin desberdinetan eta tokian tokiko ezaugarri soziolinguistikoak kontutan hartuz [A1]

2 – Historian zehar izan diren bertsolaritza geroratzeko estrategien ikerketa [A2 eta J5]

Saioen antolaketa – Sustapen estrategiak:

3 – Tokian tokiko plazen bilakaeraren eta ezaugarrien azterketa, diakronian zein sinkronian [B1]

Txapelketak:

4 – Bertsolari txapelketaren (EHko eta herrialdeetakoak) eta haren orotariko ondorioen azterketa egin [D1]

5 – Lehiakortasun apaleko txapelketa ereduak aztertu eta haien orotariko ondorioen azterketa egin [D2]

6 – Lehiakortasun apaleko eta ohiko txapelketa ereduen arteko erkaketa [D2]

Transmisioa:

7 – Herrialdeko Bertsozale Elkartearen eskutik hezkuntza arautuan, bertso eskoletan eta jarduera osagarrietan egiten den lanaren, metodologien eta emaitzen azterketa [F1]

8 – Bertsolaritzaren transmisio modu guztien azterketa: transmisio formala (hezkuntza arautua), ez formala (bertso-eskolak) eta informala (aisialdia) [F2]

9 – Bertsolaritzaren transmisioak hezkuntzaren zein gizartearen esparru ezberdinetan egin dezakeen onura eta ekarpena aztertu [F3]

Bertso-eskolak. Sarea eta harremanak:

10 – (Herrialdeko) Bertsozale Elkartearen eta bertso eskolen arteko harremanen azterketa [G3]

Bertsozale Elkartearen funtzionamendua:

11 – Bertsozale Elkarteko (Euskal Herria eta herrialdeak) funtzionamenduaren eta finantziazio bideen diagnosia egin. [J5 eta J6]

 

Horretaz gain, egutegian ondo gorde beharreko eguna da azaroaren 10a. Egun horretan bertsolaritza hizpide duten 4 doktorego-tesi ezagutu ahalko ditugu. Egileak: Ainhoa Aizpurua, Eñaut Agirre, Miren Artetxe eta Oihana Iguaran. Aldez aurretik, zorionak lauroi egindako lan eta ekarpenarengatik. 

Ikerkuntza plana
Ikerkuntza plana