Bertsolari aldizkariaren I. Bertso Idatzi Lehiaketako irabazleak

2021-09-03

Bertsolari aldizkariaren I. Bertso Idatzi Lehiaketako irabazleak –

 

Gure lehen bertso idatzi lehiaketa antolatu dugu aurten kunplitu berri ditugun 30 urteen karietara, eta hamaika sorta jaso ditugu. Mila esker parte hartzaile guztiei! Etorkizunean horrelako gehiago egiteko bultzada eman diguzue.

Epaimahaikideak Mikel Mendizabal, Ekaitz Goikoetxea eta Eli Pagola izan dira. Haiek hartu dute hartu beharreko erabakia, buruari makina bat buelta eman eta gero.

Sari ederrak jasoko ditute irabazleek, baina sari handiena, gure iduriko, norberaren bertso sorta kantu bilakatua ikustea da. Orain Oskar Estanga bertsolari eta musikariaren txanda da. Hurrengo astetik aurrera astero Estangak musikatu duen bertso sorta irabazleetako bat publikatuko dugu.

Zorionak irabazleei, bejondeizuela parte hartzaile guztioi, eta mila esker sariak banatzeko ekarpena egin duten enpresa guztiei.

Hurrengo urtean gehiago!

 

Bertsolari aldizkariaren I. Bertso Idatzi Lehiaketako irabazleakArg: Idoia Zabaleta (FOKU-Berria)

 

Gaztetxoen kategoria (14 urte arte)

 

Lehen saria: Araitz Ramos, Maddi Lasa eta Urko Ormazabal. 13-14 urte, Lasarte-Oria.

Gela Urdina scaperoom-erako (Zarautz, Gipuzkoa) lau sarrera eskuratu dituzte, baita Ternuako kamiseta bat ere. Aupa zuek!

 

KE BELTZA GURE INGURUAN

 

Doinua: Haizea dator ifarraldetik

 

Munstro berri bat eraiki zuten

gaiztoa bezain garratza

dagoeneko eten dueña

herri on baten arnasa.

Ingurukoak isilaraziz

egin zuten euren kasa,

ostu zieten herritarrei

zuten botere eskasa.

Erraustegiak handitu zuen

intzidentziaren tasa,

orain airean barrena dabil

gure zaborraren gasa.

 

 

Eskolan bertan eraiki zuten

baldintza txarregietan

etxe ondoan nahi ez zutena

ipiniz gure lurretan.

Ezin da lore berririk jaio

tristuraren errautsetan

eta zaharrak itota daude

ezintasun malkoetan.

Gure indarrak xahutu dira

jada borroka honetan,

eskola belztu zigutenetik

deabruan itzaletan.

 

 

Ustelkeria hustu ezean

itzaliko da argia

ez daigun a(ha)ztu hor dagoela

bailara honen zoria;

Batu gaitezen sendatzekotan

sortu diguten zauria,

hau baita euskal gizartearen

aurkako hondamendia

ta laino beltzek ez estaltzeko

herriaren memoria

esku bietan eutsi dezagun

geroaren miraria.

 

 

Bigarren saria: Maitexa Iriarte. 13 urte, Ibarla

 

Bere etxean jasoko ditu Bertsolari aldizkariak argitaratutako komiki eta liburu sorta, baita Ternuako kamiseta bat ere. Biba Maitexa!

 

 

Bertso eskola

 

Doinua: Kantuz sortu naiz eta

 

1/Asteartetan dugu                                     2/Kondatuko dauziegu                                                                         

   guk bertso-eskola                                     sekretu bat, huna :

   ez badu_iduri ere                                     Aitzakia bezala

   buruko kirola                                            baliatzen duguna

   bertso on bat egitea                                 atsaskariari esker

   da sartzea gola                                         bertsoa laguna

   asteartez emeki                                       eta gainera beti

   pasten ikastola                                         da biziki huna

   erakaslea salbu                                         guk, eta guk bakarrik

   nehor ez kakola                                        dugun ondasuna

   Bertsolari bikainak                                   asteart guzietako

   bihurtuko hola !                                        kinder erresuma !

 

3/Baina atsaskariek

    ezin ordezkatu

    gure erakasleak

    dohain ainitz baitu

    berari esker gira

    lehiaketan batu

    gordetzen badugu_ere

    betitik maitatu

    lehen kurtsoan zauku

    bihotzean sartu

    « Xan xure eskertzeko

    bertso hau asmatu »

 

 

 

 

 

 

Helduen kategoria (14 urtetik goiti)

 

Lehen saria: Iñigo Legorburu Arregi. 44 urte, Hernani

Elkano scaperoom-erako bi sarrera eta Kabian apartamentuetan gau bat bi lagunentzat (Getaria, Gipuzkoa), baita Ternuako kamiseta bat ere. Zorionak Iñigo!

 

BULARRETIK MINTZO

 

Doinua: Amaren bularra (X. Lete)

 

 

Hitzartuta bezala,

ilunabarrean

aspaldiko promesa

baten aparrean

hasi da abentura…

diot marmarrean

nerabea zarela

ahaztu xamarrean.

Estrainekoz, eskutik

estilo zaharrean

nerbioek barrutik

gu jan beharrean…

Normaltasun eria

denez indarrean

zenbat lehenengo aldi,

aldi bakarrean!

 

 

Eritasuna gaixo

jarri bitartean

konplize izatera

garamatzate han.

Ileapaindegiko

eskaparatean

diozu ezin gara

gelditu atean!

Ziurtasunez niri

hori esatean

esperantza piztu da

nire aldartean…

Harrotasunez bete

nauzu bat-batean

zu zarenaren zati

biok izatean.

 

 

Emozioz dardarka

daukazu kokotza

baina ausarki moztu

dizute mototsa:

Ama, bizi duzuna

gaur ez zait arrotza,

zure ile-ordea

jada ez da motza!

Kimio, goragale

ta beldur bakoitza

urrun nabari ditut,

urrun heriotza!

Hil ordez, ile-orde…

ta akabo lotsa!

Bularraren ordezko

dut zure bihotza.

 

 

 

Bigarren saria: Mikel Retolaza Etxebarria. 27 urte, Busturia

 

Honako saria eskuratu du: Eleizondo Landaetxean gau bat bi lagunentzat eta Lasturko tabernan otordu bana bi lagunentzat, baita Ternuako kamiseta bat ere. Gozatu, Mikel!

 

 

HOZKAILU ZAHARRARI”

 

Doinua: Potajearena

 

 

Jaki goxoak arin

joaten zaizkizu bai

trukean gordez inork

ez dituenak nahi

paregabea zara

onartzen dut lasai

urteen joanean

bihurtu zara, ai!

nire lagun min eta

baskularen etsai

 

 

 

Imanez eusten duzu

zita zein oharra,

salbu mantenduz gure

memoria txarra

gainera eginda ere

mesede edarra,

ez al da injustizi

potolo xamarra

besteok betetzeko

zu hustu beharra?

 

 

Omenaldi txiki bat

zen gure erronka

ta horrela irten da

zuretzako sorta

segi gauzak gordetzen

nahiz ta gero bota

hemen segi dezazun

egin daigun topa,

hain hotza izateak

ez digu inporta!

Bertsolari aldizkariaren I. Bertso Idatzi Lehiaketako irabazleak Bertsolari aldizkariaren I. Bertso Idatzi Lehiaketako irabazleak Bertsolari aldizkariaren I. Bertso Idatzi Lehiaketako irabazleak