Desentxufatu nazazu
Desentxufatu nazazu –
Gure lehen bertso idatzi lehiaketa antolatu genuen 2021an, aldizkari honen 30. urteurrenaren karietara. Bigarren edizioan bertso sorta kopuru polita jaso genuen, eta azken honetan ere iritsi zaizkigu zuen bertso sortak. Mila esker parte hartzaile guztiei, beraz, eta denok etxean jasoko duzuen Imanol Lazkanoren “Aho bizarrik gabe” liburuaz majo gozatzea opa dizuegu, baita bertsotan jarraitzea arkatzez zein mingainez. Sarituontzako sari txukunak lortzen saiatu gara aurtengoan ere, espero dugu horietaz ere merezi duzuen bezala disfrutatzea.
Epaimahaikideak Iñaki Murua, Ekaitz Goikoetxea eta Eli Pagola izan dira, eta hartu dute hartu beharreko erabakia.
Zorionak irabazleei, bejondeizuela parte hartzaile guztioi, eskerrik beroenak epaileei, eta agur bero bat sariak banatzeko ekarpena egin duten enpresa guztiei.
Hurrengo urtean gehiago!
Helduen kategoria
Lehen saria: Aitor Tatiegi Loidi, 22 urte, Oñati. Asteburu bat bi lagunentzako Aritzaleku kanpineko (Lerate, Nafarroa) bungalou batean. Bejondaizula, Aitor!
Desentxufatu nazazu
Doinua: Hor bide eguzkitsu bat/ Xorieri mintzo zen.
Gaztetan jartzen zenuen
nigan atzapar mardula,
gaur egun taburetean
bakanduz ile azula.
Varon-Dandy lurrinaren
nostalgiaren ahula (bis)
ez zenezake kalkula.
Botoia zanpatzen duzu
nola bi oinek baskula.
Nahiz jendeari kontatu
oso bero naukazula,
nik isurtzeko gogorik
ez dut sentitu sekula! (Bis)
(Oso bero naukazula.*)
Tragoren bat hartuz gero
egin izan didazu hitz-
ahopean- “gaur zortea
aldeko egongo balitz”.
Txanponak aukeratu ohi
zenituen kontu handiz. (bis)
Bi begiak gorri hagitz.
Jakin beharko zenuke
jada ulerkera argiz,
datozkidan irudiak
desberdinak dira; aldiz:
Hiru bihotz aldi baten
zein bihotz bat hiru aldiz. (Bis)
(Desberdinak dira aldiz.*)
Niri begira jarrita,
behatza zuzenduz, baxu
“tragaperras alu hori…”
egin didazu mehatxu.
Nire mundu fantastiko
ta emakume bulartsu… (Bis)
Zenbat ilusio faltsu!
Bakarrik sentitzen zara,
beste asko bezalatsu.
Ni hilda egongo banaiz
bizitzeko gai zara zu.
tabernatik joan aurretik
desentxufatu nazazu. . . .
