[Ziegatik bertsotan V] Abel Enbeita

Abendua hasi ta

urtarrila gero

zulo hontan sartuta

gaude egunero

Otsailak ere agur

zer al dator gero?

Juez hauen asmoak

somatu ezkero

ezer berririk asko

nolatan espero.

Seigarren zenbakia

gure “galeria”

hirugarren pisuan

“ziega” ileria

ehun lagun hirunaka

dena gazteria

bakoitza zenbaki bat

hau da miseria…!

Abereak al gara?

Dirudi feria.

Goizetan itxartuta

begiak leihora

gero haizea hartzen denok patiora.

Goguak ihes dagi

geure ilusiora

bizitzak beti behar

luken baliora

baina horma hauekin

nor joan inora.

Tartean izan dira

hamaika egun latz

azaltzea zaila da

bertsoetan zehatz

gorputz findu hauetan

makina bat akats

askatasunarekin

ez gaude aberats

etorkizuna berriz

burni tartean baltz.

Ehun lagun batera ta

ehun ta bat jenio

batzuetan aingeru

gero demonio

lagunik jatorrena

edo arerio

besteen arrazoiak

gutxitan balio

anarkismoak bere

hazia dario.

Egoera honetan

ehun euskaldun gazte

denok anaiak eta

zenbat buru hauste

Ordu batzuek alai

beste asko triste…

Jasan behar dugunik

beste horrenbeste…!

askatasuna ginan

ta preso gaituzte.