Nafarroako bertsolaritza ikertzeko 40.000 euroko diru-laguntza emango du Euskarabideak

Nafarroako bertsolaritza ikertzeko 40.000 euroko diru-laguntza emango du Euskarabideak –

NAIZ-etik.


 

Nafarroako bertsolaritza ikertzeko hitzarmena sinatu dute Euskarabideak eta Nafarroako Bertsozale Elkarteak. Honon ondorioz, 40.000 euroko diru-laguntza emango du Nafarroako Gobernuak urteetan ondarea biltzen eta ikertzen eman duten lana onartuz.

 

Nafarroako bertsolaritza ikertzeko 40.000 euroko diru-laguntza emango du Euskarabideak
Ana Ollo Herritar Harremanetarako kontseilaria eta Ander Perez Nafarroako Bertsozale Elkarteko koordinatzailea hitzarmena sinatzen. (NAFARROAKO GOBERNUA)

 

Euskarabideak eta Nafarroako Bertsozale Elkarteak 40.000 euroko diru-laguntza suposatzen duen hitzarmena sinatu dute 2022an zehar dokumentazioan oinarritutako eta bereziki Nafarroako bertsolaritzan oinarritutako ikerketa lan bat egiteko.

Akordio horri esker, bertsolaritzak Nafarroan uzten duen ondarea biltzeko eta ikertzaileen esku jartzeko elkarteak urteetan egindako lanak erakundeen aitortza eta finantzazioa jasoko du.

Ana Ollo Herritarrekiko Harremanetako kontseilariak hitzarmenaren aurkezpenean adierazi duenez, «gogoan hartu behar da Nafarroako Gobernuak, 2018. urtean, Kultur Intereseko Ondasun izendatu zuela bertsolaritza, Nafarroako kantu inprobisatuaren adierazpiderik nabarmenentzat aitortuz eta zaindu eta transmititu beharreko ondare materiagabetzat hartuz». «Orain sinatutako hitzarmen honek bultzada berri bat emango dio helburu horri, bertsolaritzak eragiten duen ondarea jasotzeko eta ondare hori biharko belaunaldi zein ikertzaileen esku uzteko», gaineratu du.

Urteak dira Nafarroako Bertsozale Elkarteak (NBE) bertsolaritza geroratzeko helburuari jarraika, dokumentazioa eta ikerkuntza bere jardunaren oinarritzat jo zituela. Ordutik, bertsolaritzak Nafarroan eragindako ondarea biltzeko eta dokumentatzeko ahaleginean aritu da elkartea. Urtean zehar 200 bat bertso ekitaldi egiten dira Nafarroan eta horien lagin garrantzitsu bat dokumentatzea (audio eta bideo grabazioak, argazkiak, kartelak, saioen transkripzioak, datu bilketa…) erronkatzat du NBEk. Era berean, bertsolaritzarekin lotutako pertsonen (bertsolarien, epaileen, gai-jartzaileen, antolatzaileen) biografiak eguneratzen dira urtero eta hemeroteka antolatzen da, besteak beste.

 

Xenpelar Dokumentazio Zentroaren laguntza

Zeregin horretan, Xenpelar Dokumentazio Zentroaren (XDZ) ezinbesteko laguntza du NBEk. 1991ean sortua, bertsolaritzaren ondarea bildu, antolatu eta gizarteratzen du XDZk, maila guztietako eta ikuspuntu guztietatik egindako ikerkuntza bultzatzeko helburuarekin. XDZk ezarritako irizpideen arabera biltzen du ondarea NBEk, Bertsolaritzaren corpus garaikidea osatuz. Modu horretan, bertsolaritza belaunaldiz belaunaldi transmititzeko oinarrizko funtsa osatzeaz gain, orotariko ikerketak gauza daitezen oinarri dokumentala ezartzen du.

Gogoratu behar da, Euskarabidearen zereginen artean, euskara bizitza sozialeko esparruetan agertu eta erabiltzeko informazio eta sentsibilizazio programak gauzatzea eta helburu hori bera duten entitate publiko eta pribatuekin lankidetzan aritzea dela; eta hitzarmenak bete-betean jotzen du bere asmoekin.

Nafarroako bertsolaritza ikertzeko 40.000 euroko diru-laguntza emango du Euskarabideak