TXIMELETEN IRAULTZA

1.

Tximeletak beregan


bizi du iraultza.


Geuk ere galtzen dugu


hegotako hautsa,


gara izan nahi dugun


denaren arrautza…


baina nahiz sentitu hain


txiki ta ezgauza


gugan lo egoten da


maiz pinpilipauxa.

2.

Lozorroan egonak


gara aharrausika,


ametsak debekatu


zaizkigu auzika,


nahiz amesgaiztoekin


eduki gau-zita


hegan atera gara,


aurretik jausita…


(a)inguratzen gintuen


oskola hautsita

3.

Borroka egitea


agian hori da:


saiatzea ez galtzen


geure perspektiba


begi bakoitza bultzaz


behar den tokira,


bat orainera eta


bat lehenaldira,


ta begirada, berriz,


aurrera begira.

4.

Hiru hamarkadatan


bizi eta gero

Nostalgia bihurtu


nahi genuke gero


ginena izaterik


ez dugu espero


garenean ginena


dugu honezkero…


zer garen hautatu nahi


dugu egunero.

5.

Tximeletak nahiz eta

aldatu aurpegiz


nahiz ta aldatu bidez


edo ikuspegiz…


kate bat osatzen du,


aske,kate-begiz…


Berdin ikasi dugu,

JARRAIz,HAIKAz,SEGIz…


etengabe eteten,


etengabe segiz.

Alaia Martin