Dena aldatu daiteke –
Doinua: Dena aldatzen da
Karga kenduaz gainetik
itzaliz barne motorrak
ez al dira parentesi
moduko batzuk oporrak?
Kanpora joan ohi gara
helmuga on bat tarteko
gure egunerokotik
azkar ihes egiteko
Batzuek egitaraua
ta besteek deskantsua
baina ez dadila izan
parentesia antzua
Ta ibili ohi garenez
beti urduri antzeko
aprobetxatu nahi nuen
pixka bat erlaxatzeko
Lasai egon ta denbora
oso motel pasa zedin
asteroko errutina
behingoagatik desegin
Eguzkitan etzanda ta
paradisuzko lekua
ia izan zitekeen
nire egun perfektua
Baina ezin gara guztiz
lasaitu azken finean
uneoro baitaukagu
hodei handi bat gainean
Ez zaitez egun osoa
hortxe etzanda geratu
ez zaitez nagia izan
lan pixka bat aurreratu
Ta edukiko bazenu
datua jada ahantzia:
aurreko urtean hobe
zeneukan bainujantzia
Kirola egin ta x
pausu egun bakoitzeko
azkenaldian jandako
guztia orekatzeko
Begiratu ingurura
analisiari ekin
turista bat zara horrek
dakarren guztiarekin
Mezuak idatzi ta ez
ahaztu zure lagunak
ez zabiltza ondo zaintzen
eta maite dituzunak
Uneoro gogoratu
zure papera gainera
astelehenean itzuli
behar zarela lanera
Nahiz ta ondo zaudenaren
plantak egin oporrekin
nor engainatu nahi duzu
finean fartsa honekin?
Jasanezina da hodei
horren azpiko itzala
ta ekaitz bihurtzen ari
da denbora pasa ahala
Ihesa ezinezkoa
ez al da mundu honetan?
logika hau sartzen zaigu
zirrikitu guztietan
Bizitza bat nahiko nuke
baldin badago biharrik
ez duena irudizko
parentesien beharrik
Ta horretara heltzeko
bidea nola bilatu?
egin behar duguna da
agian dena aldatu
