Ederbidean –
Doinua: Segidilla
Lanean jai astebete,
alforjak ilusioz bete,
lau egunerako beste
burua patxada eske
Zertan joan urruti?
bideak hor eduki
seinale eta guzti
nahiz ta euritan busti,…
hemen aitzaki guti!
Aukera izan ta hola,
probextuz bertan dagola
Bidasoa-Plazaola
lotzen duen bidea
dugun Ederbidea,
behin saretik jeitsi mapa,
antolatu lau etapa,
zelaia zein aldapa
hemen duzue, ttaka!
Segidillazko “Tracka”:
1-Bera-Beintza Labaien
Abiapuntua BERA
nire etxea (nire aukera).
ALTZATE ta EZTEGARA
pasa ta BIDASOAra…
eta le(he)n irudia:
San Migelgo zubia!.
ALKAIAGAn “trenbidea”
izan zenaren idea,:
Orduko Tren Txikitoa.
berritasunak itoa,
orain bide berdea.
Badabil bai jendea!.
LESAKA zaintzen BEREAU
Alanen, zakurrek uau uau!
Presak ere zutik dirau!
tunela pasa eta didau,
IGANTZIKO BENTETAN.
(“Berrizaun” seinaletan).
SUNBILA aldera hartuz,
tunela hor da ta kontuz!
Gero horren segidan,
Espelosinen miran,
Zubitxo bat dilindan.
Bisustako ur jauzia
bazterrean ikusia,
SUNBILAN,herri barnetik
pasa ta, bide beretik,
hortxe da DONEZTEBE,
bailarako errege.
Ai! agur bide berde!
segitzea dut xede.
Goian niri so hodeia
errepiderako deia;
Lau mila ta berrogeia
hartzea nere ideia.
Kaxkartu da denbora,
hala ere gustora!
DONAMARIn edo OIZEN
laua utziz,maldak goitzen,
(bat ez da hontara ohitzen!)
ta bat-batean URROZ.
Leurtzan bañu bat gustoz
hartuko nuke baina
hantxe da, Alajaina!
Azken sei kilometrotan
sartu eta segi hortan,
lehenengoa bukatzear
bide lasaietan zehar
BEINTZA-LABAIEN, hara!
Ba, gaurko helmugara
ere ailegatu gara!
Hantxe dago Orbela,
otorduak,zein gela,
esperoan daudela.
Ba, merezi bezela
har dezadan atseden.
ia bihar nola gauden!
2-Beintza Labaien-Lekunberri
Beintzan atseden hartu ta
berriz indarrak hartuta.
Pedalkadaka, ariaz,
hor agertu zait SALDIAS,
pixko bat maldan behiti,
(ai hola balitz beti!).
Agurtuaz MALERREKA,
maldan goiti, GOROSTIETA
goitzea dagokit eta.
Helburua: OROKIETA.
Baina behin kaxkora heldu,
lasaitasun ta sosegu
ederra har dezakegu.
Helmuga ttiki ta zeru
izan daiteke hura.
Ze, handik abentura
doa BASABURURA.
Bertan sartzerako OLA
“kaixo” erran nahirik hola
OROKIETAKO herrira
heldu ta berantz segida.
Be(he)an zai dago ERBITI,
GARTZARONerantz poliki,
ta handik JAUNTSARATSa.
Hiriburu ta ardatza.
IHABEN ere ze polita!.
BASABURUA utzita,
IMOTZen, ETXALEKU
ta ERASO agertu,
LATASAn ere prestu,
Plazaolako gertu.
Ba, goazen LARRAUNera
ta LEKUNBERRI aldera
ez! ez dira gauza bera!
Bi udalen arabera
bait daude bereizita.
ba! mobidak utzita.
sasi-ordeka igo,
ta bertan da MUGIRO,
gero astiro-astiro
gogo eta motibo,
begi-bistan LEKUNBERRI.
Aspaldiko, ze, ze berri?
Gorka Urbizuren herri
tira, Gorka, edo Berri,…
Geltokian Checkina,
zai Aralar Kanpina.
Gaur ere zeregina
bezperako berdina:
Jan ta lo egin bapo
ta prestatu beharko
hirugarrenerako.
3-Lekunberri-Donostia
Ze ederra loaldia,
ta herriko gosaria,
berpizteko miraria,
alde da eguraldia.
Goazen Plazaolara.
Hasteko goiti, hara!
Baina UITZIko tunela,
luzea eta umela,
erdira iritsi eta
desnibelari iseka.
Hor hasten da onena,
nolako gozamena!
Airean doa txirrinda
a(ha)legin gutti eginda
LEITZAn oharkabean.
Ikusmira aldean
giro paregabean
aintzinera airean.
Gero LEITZARANdik barna,
zuhaitz ta erreken xarma,
ANDOAINa heltzeko.
Han bidegorriz lepo.
URNIETA ta HERNANI
Martxoan egona ni
parrandan,edanean,…
orain bertze planean.
ASTIGARRAGA ze lasai
bertakoek beti hala nahi,
ez jendea sagardoz blai
eta portatzen nolanahi.
Bistan da DONOSTIA
bisitan eguzkia,
ni izerdiz bustia.
MARTUTENEn Sarri sarri,
ez dute entzuten sarri,
bere doinu ta aldarri,
ihes bat baitu oinarri
debekua dute jarri.
Behin Fermin, agertu han
ta bere kontzertuan
kantatu zuen kanta.
Nahiz ta ez sartu hanka,
gero bronka galanta!.
Gaur bukaera LOIOLAn
hona heltzeko nahiko lan
non ote Bilintxen plaza?
(gaizoak ze kalabaza!)
Hostala bertan dut ,ai!
beraz, pedalei “Jai-jai”,
ta etapari ere bai!
4-Donostia-Bera
Laugarren ta azken etapa,
bagoazela ttipi-ttapa,
edo pedalkadaka,
Bidegorrien mapa,
manillarrean itseki
(ongi etortzen da beti).
Goazen emeki emeki
arren bidea ireki!
Urumea hertzetik,
Gero AMARA BERRItik,
hiriaren erditik,
segitzea dagokit.
Ohartzerako AMARAN,
ibilgailuak ilaran,
nola karril bat daukadan,
autoak ez daude traban.
Gero BOULEBARREAN,
Erlojua aurrean.
ZURRIOLAn berriz Kursaala
agurreko diosala
merezi duen bezala
kulturaz orni gaitzala.
Bertan agurtu kosta.
INTXAURRONDORAntz ospa.
Ez da zelaia, ospa!
Goitu dut ozta-ozta.
Ta gero datoz PASAIAk
aldatu dira paisaiak
SAN PEDRO ta TRINTXERPE
arrantzaleen aterpe.
TRINTXERPEtik ANTXORA
Bidea igualtxo da.
Karreteran trafikoa
ez dudana begikoa,
giro hortan,logikoa
arnas estuka, itoa.
ORERETAn azaldu!
Bertan ezin naiz galdu.
Han, dotore Zumardia,
ta ondoan Fanderia.
OIARTZUNekin du muga
hura dut hurrengo helmuga,
Arragua auzoan
haruntza, erasoan
noa nire pausoan,
ia bide osoan.
OIARTZUNen, Arditurri,
orain,meatzetan,urri.
Paseorako bidea
ederki dago ordea.
Handik bidetan barna
GPSak, ai ama
Gurutzera narama!.
Gurutze azken kaxkoa,
orain dena beranzkoa.
Bidexketatik IRUNa,
toki hau du ezaguna,
Urdanibia plaza!
Gelditu gabe pasa.
etxea zai da, aizu!
Beraz segi jo ta su!
Behobian da PAUSU.
Muga ez da arazoa
halaxe dugu jasoa,
ezkerrean Bidasoa
ze bide lagun goxoa,
etxerantza hurbiltzen
ez da ezer gelditzen!
Gainean da Endarlatza,
bertan gertaera latza
hor azaldu zen Zabaltza,
oroimenak bertan datza.
Handik Zalain Zokora,
Zalainera gerora
ia etxe ondora
nere animoak gora.
Alkaiaga aldera tira,
lehen egunari begira,
eginez kalkulua
bete da zirkulua.
Agerra ta Eztegara,
animo bertan bait gara!
Altzate ta Illekueta
Suspelan sasi-ordeka
etxeraino heltzeko.
Bertan dagoeneko
ilobak muxuz lepo
osaba agurtzeko.
Lau eguneko abentura
amaierara heldu da.
Hartuko dut atseden,
zein ederra izan den!.
Mundua alderik alde
bisitatzeko prest gaude.
Ongi dago, baina halare,
egin dugunaren jabe
urrutira joan gabe
leku ederrak daude!
