Gabonetako argiak

Felix Zubia

Felix Zubia

2021-11-10

gabonetako argiak –

Doinua: Esplikatzera noa kontuak

 

 

Santu Guztiak pasatu eta

Astea osatu gabe,

Gure kaleak kable mordoaz

Bete dira parez pare.

“Gabon argiak” esan didate

Egin dudanean galde,

Barru-barrutik erantzun diet

“erotuta ote gaude?”

 

Kanpaiak eta zuhaitz txikiak,

Oreinak eta ardiak,

Olentzeroren, Bizar Zuriren,

Buru eta aurpegiak.

Nola demontre jarri litezke

Garai honetan argiak?

Bonbiladunak ditugu baina

Ez dira oso argiak.

 

Asteburuan tren bat bueltaka

Ibili da kalez kale,

Gabon kantekin megafoniaz,

Ezin zuten egin kale.

Gabon garaian izanagatik

Halako kontuen zale,

Egutegia euren erara

Jarri nahi duten seinale.

 

Mirandaolan gaur Olentzero

Izan dute, goiztiarra,

Irakurtzean bururatu zait,

“Berriz ere, kaka zaharra”.

Ez dakit zer den, utzikeria,

Edo borondate txarra,

Hau da guztia garaiz baino lehen

Derrigor sartu beharra.

 

Egun normalik ezin du izan,

Gusturik ez da grisean,

Beti gabiltza zerbait ospatzen,

Errutinen ihesean.

Pozik nago ba egutegiko

Letra beltzen babesean,

Gaizto samarra galdera baina

Nor dago honen atzean?

 

Bi hilabetez Gabonak eta

Lau hilabetez udara,

Aste Santua eta zubiak

Ezin txokorako laga.

Alde batetik barregarria,

Beste batetik, ikara.

Kontsumoaren egutegian

Gustora erori gara.

 

Honek atzean duen mezua,

Ez bazara konturatu.

Festak ditugu, hartu txartela,

Erosi eta gastatu.

Azaroa da tristea eta

Behar dugu lurperatu,

Argiak martxan ditugu eta

Funtzioan parte hartu.

 

Argindarra garesti baina

Berria ez da iritsi,

CO2-aren isurketarik

Zertarako sortarazi.

Kontsumoaren kaltea zein den

Ez ote dugu ikasi?

Begirik ezin da itxi baina

Zuen poltsikoak itxi.

gabonetako argiak