Gezurrei –
Doinua: Zure bular politak
Momentuko mesede
gerorako kalte
inguruko lotsati
koldarrenen kate
nahiz eta ezkutatzen
saiatu gaur arte
beste behin gezurretan
harrapatu naute
Bizitzak ematen du
zenbait erreparo
zertxobait gordetzea
nork ez du gurago?
egiak isiltasun
gezurrak berbaro
gezur denen atzean
egia bat dago
“Bizikidetza heldu
da gure herrira”
edo “lan-istripuak
istripuak dira”
gezur bat ekartzeko
kontzientzia azpira
bi bider entzutea
sarritan aski da
Gezurren bat sartu da
etxean ortozik
kezkagarria dena
abila ez ezik
“laztana zer daukazu?
gaur ez zaude pozik
lasai, ez nago triste
nekatuta baizik”
Nahiz ta gezurrak entzun
berbatik berbara
sarri ohartzerako
berandu da jada
gutxitan heltzen gara
sasoiz egiara
denbora poligrafo
motelegia da
“Trago bat ta etxera”
astero astero
espuela denak dira
erdi enbustero
ez dena sinesterik
ezin da espero
zer diogun edonork
daki honezkero
Lau bertso idazteko
saiakera baten
nola guztia ez den
samurra izaten
nahiz ta edozer gauza
idatzi nezaken
paper zuriak ez du
gezurrik esaten.
