Felix Zubia
Felix Zubia

2022-12-21

Insomnioa

Insomnioa –

Doinua: Behin batian Loiolan III

 

Zer ote da, adinak

duen endredoa?

Edo burukominen

ondorio eroa,

Nahizta gustuko izan

oheko beroa,

ezin lorikan egin

hau paraderoa (bis).

 

Goizeko seiterditan

goizero esnatu,

eta jaiegunetan

hortara bueltatu.

Eta nahi eta ere

ezin lorik hartu,

iratzargailu hori

nork deskonektatu? (bis).

 

Hogeita lau urtean

guardiak egina,

gauetan zortzi aldiz

esnatuz txirrina.

Hurrengo egunean

lo egin ezina,

garun eta soinean

zer nolako mina (bis).

 

Martxan badabilkizu

buruko errota,

alperrik joango zara

koltxoiaren kontra.

Bihotza geldiezin,

ideiak borborka,

nork kontrolatuko du

kirioen soka (bis).

 

 

Bestetan esnatzen naiz

berriz goizaldera,

kolpetik azalduaz

lehengo kontu bera.

Arazoan sartuta

gora eta behera,

berriro lehen eginik

hor noa lanera (bis).

 

Buruan badituzu

hamaika arazo,

“burukoari galde”

entzuna da oso.

Mezuak jasotzeko

motza naiz akaso,

baina sekula ez dut

erantzunik jaso (bis).

 

Pandemia garaian

mila gorabehera,

horiek denak buruan

sartzean ohera.

Begirik bildu gabe

berriro kalera,

argaltzeko metodo

txukuna ote da? (bis)

 

Zer dugu, zahartzeak

jartzen duen langa?

Edo estresagatik

barruko eztanda.

Bueltaka nabilela

dinbi eta danba,

bertsoak jartzen ditut

ohean etzanda (bis).

Insomnioa