Isilik inola ez! –
Doinua: Hertzainak
Isilik inola ez hobe da abestu (bis)
asteburu itzela zaigunez aurkeztu
aurkeztu ta nola saihestu?
hau maite ez duenak bizitzerik ez du.
Ortziralez oholtzan berriro hertzainak (bis)
Gazte, heldu, zahar, ttiki, handi zein ertainak
Hertzainak, astinduz mingainak
gustuko ez duenak hutsik dauzka zainak
“Ze gozatu!” da entzuten genun esaldia (bis)
berriro ere jarri gintuzten “al dia”
esaldia, a ze nostalgia!
Ez da gertatzen zaidan lehenengo aldia
Kontu zabaldua da nostalgiarena (bis)
BEC utzi genuen ta Navarrra Arena
Arena, ginena, garena!
mundiala jokatu zen egunarena
Futboletik nahiz zail den joatea ihesi (bis)
hitzen mundialak ere dena du merezi
merezi, gailendu arren Messi
bertsoak egin zuen eguna berezi
Hiri buruzagian, ze besta, ze egun! (bis)
batera zenbat gauza egin ditzakegun
ze egun ta milaka lagun
denak irabazle ta Maialen txapeldun
Ahantzi gabe Hatortxu aipatzera goazen (bis)
zapalduen aldeko borroken almazen
goazen Presoak ekartzen
zoritxarrez “hat-trick”a, gehiegizkoa zen
Ganbara astindu ta apurtu kartzela (bis)
asteburu honetan gertatu bezela
bezela, argi dut horrela
bizi-bizi dagoen herri bat garela
