Zazpi amets –
Doinua: bertsuak jarri dizkat
Zazpi amets nituen
Umea nintzela,
Heldu bihurtu eta
Nolako ergela,
ez nintzen konturatu
galdu nituela (bis)
Pailazo izan eta
Barrea eragin,
Lotsatuz gorde nuen,
Barruan zenbat min,
Inork ez ziezadan
Barrerikan egin (bis).
Musikari bihurtu,
Denak dantzan jarri,
“ez duk ogibidea”
Entzun nuen sarri,
Ezin dut bihotzera
Notarik ekarri (bis).
Dantzatu kaxarranka,
Edo aurreskua,
Oinak lotu nituen,
Oratu eskua,
Zergatik ote daukat
Hain barru estua? (bis)
Ipuinak entzutera
Ume denak batu,
Gaur guztiz damutzen naiz,
Zertan ezkutatu,
Ametsei ezin zaie
Ipuinik kontatu (bis).
Olerkiak pozarren
Edo maiteminez,
Estaliak zamaren
Grisaren buztinez,
Husten ez den arima
Lehertuko zait minez (bis).
Aktore izateko
Nahiz izan denbora,
Autoestima baxu,
Eta lotsa sobra,
Egunero antzezten
Dugu gure obra (bis).
Koadroak margotzea
Barruko ametsa,
Ez nuen egin eta,
Orain ondo pentsa,
Zer dela eta dudan
Pentsamendu beltza (bis).
Hogeita lau beteta,
Ez dira hain gutxi,
Plazara irten nintzen,
Orain arte eutsi,
Zortzigarren ametsa
Ezin nuen utzi (bis).
Noizbait baldin banago
Tristatu antzean,
Arrazoia ekarri,
Errimak atzean,
Ametsa betetzen dut
Bertso bakoitzean (bis).
