AR-taldetik kanpo
AR-taldetik kanpo –
Doinua: Haizea dator iparraldetik
Tarta gaineko zenbaki hauek
Hogeiraino iristean
Etorkizuna zuria zena
Belzten ari zaidanean
Ohe ertzean gora begira
Eta pentsatzen hastean:
“Zergatik ote nago hain ahul
Bizitzaren aparrean?”
Aurikularrak topera jarriz
Paper zati bat hartzean
Hitzak zein azkar irteten diren
Bakarrik nagoenean.
Egun osoa igarotzen dut
Hamar azazkalak jaten
Gelakideen komentario
Homofoboak jasaten
Euren txisteen aurrean mutu
Errespetatu nazaten
Azken urteak pasatu ditut
Naizen hori ez izaten
Neska gazteak, futbola eta
Garagardoak edaten
Malapartatu horiek minik
Egin ez diezadaten.
Bitan pentsatu gabe aldatu
Whatsapp-eko argazkia
Ortzadarraren bandera eta
Esaldi bat idatzia:
“Orain aske naiz eta berdin zait
Zein den zuen iritzia!”
Badakit orain datorkidala
Whatsapp mezu sarraskia
Baina zailena egin ondoren
Lasaitzen nago hasia
Irrifar batez gaindituko dut
Parean dudan guztia.
Andoni Etxabe Uria
