Doinua: asteburu aldera
Gogoan dut laneko
Lehenengo eguna (bis),
Tornuaren aurreko
Lanaldi astuna.
Guzti hau zertarako?
Hara erantzuna,
Lehen soldatarekin,
Pentsatu laguna,
Azkar bihurtu nintzen
Bemeuveduna (bis).
Kotxeak nola izan
Itxura normala (bis),
Beltzez margotu nuen
Behar den bezala.
Ispilu koloretan
Estali kristala,
Inork begiratzean
Kanpotik, aibala,
Begitan inbidia
Ikusi dezala (bis).
Zabal jarri dizkiot
Gurpil eta llanta (bis),
Bidean izateko
Behar duen planta,
Iheseko tututik
Tarrapatapata,
Biribilguneetan
Zapaltzean hanka,
Denek soma dezaten
Burrunba galanta (bis).
Gabiria, Jaizkibel,
Urrakitik Gorla (bis),
Ralliak ezin dira
Baztertu inola.
Gasolinaz betetzen
Baitugu odola,
Euritan, lehorrean,
Ez zaigu axola,
Errebueltak jatea
Da gure eskola (bis).
Bidera irtetean
Animoa jaso (bis),
Bizitzak beste ezer
Ba al du akaso?
Ertzaintzarekin ditut
Hainbeste arazo,
Honi buruz hizketan
Jardun ginen atzo,
Zer dela eta doaz
Denak horren mantso? (bis)
Ipurdi janez noa
Besteen atzetik (bis),
Karakolak aldendu
Zaitezte paretik.
Gizajoak frenatu
Zuenez kolpetik,
Bi femurrak hautsita,
Burua atetik,
Bertsoak jartzen nago
ZIUko ohetik (bis).
Bemeuveduna
