Gure ondoan da –
Doinua: Seme ezarri bainauk
Txiste artean egin
abiapundua
bihurtu da lobien
arteko gudua.
Bakoitzak bere egi
eta aburua,
eta gaixotu gira,
hau da segurua:
gu baino gaixoago
zelako mundua.
Nola sortu da eta
nola da eria
mundu erdia? Sustut,
gu, langileria.
Kapitalismoari
luzatuz begia
Batu ditu gezurra
eta miseria,
Sosarekin erosten
delako egia.
Geroz ta hurbilago
zelako hil kutxa
Etxea bete dugu
utziz kale hutsa.
Instituzioetatik
nahi dute usa,
Barkatu bainan ez dut
ulertzen eskusa:
Armen bidez sendatzen
ote da birusa?
Txaloka entzun ditut
balkoi eta sala
Baina korona gabe
Ez zen bate hala.
Jantzi xuri atzean
beltza da itzala,
Doblea izanen zen
burgesen ahala,
Osasunak ekartzen
balu kapitala.
Etekina/bizia
hasi da derbia.
Lanera derrigortuz
jendeen erdia,
Diruak hautatu du
bere alderdia.
Birusak galdu dezan
bere energia,
Antidotoa al da
gure izerdia?
Kaleko eskaleak
edo etorkinak,
senarrarekin preso
dituzten biktimak,
Nola Ongi Izate
estatu gordinak
Koronarekin ditu
eroriz eginak,
garai diferenteak,
biktima berdinak?
Zaintzaz, elkartasunez
egin zutabea
mundu honetan ez da
gerorik gabea.
Nahiz guretzat nahi duten
bizitza grabea,
Antolakuntzaz jaso
dugu ondarea:
Saretuz hautsiko da
burgesen sarea.
Elkartasun sareek
eginik eztanda
zaintzaz beteko dira
hiri eta landa.
Piramide bat bada
lurrean etzanda
Ta itxoiten baduzu
laguntzaren txanda:
ez da zure gainean,
zure ondoan da.
