Felix Zubia
Felix Zubia

2020-11-24

Txoriak gara kaiolan

Txoriak gara kaiolan –

Doinua: ETAren su etenetik.

 

 

Pertsonak beti omen du

Askatasuna senean,

Baina asko tresabira

Biltzen gara zuzenean.

Burua bertan jarrita

Nagusien esanean,

Goizeroko alpistea

Janez modu otzanean.

Sarritan ideia bera

Etortzen zait, azkenean,

Gure pentsamenduetan,

Aisialdian, lanean,

Txori txikiak garela

Kaiola baten barnean.

 

 

Homo Sapiens omen da

Biologian pertsona,

Hiztuna, ameslaria,

Pentsamendutan sakona.

Kate motzean jarriak

Gaude, hara eta hona,

Loturak hartu ditzake

Itxuraz hainbeste forma.

Kontsumoaren bidetik

Etortzen den zoriona,

Artaldearen babesa,

Ospea, itxura ona,

Ez da harrizkoa soilik

Eraiki diguten horma.

 

 

Erosketen plazeretik

Etortzen den endorfina,

Sare sozialen klik-etik

Gure lotsaren morfina,

Artaldeen bidaietan

Sortzen den atzerri-mina,

Interneteko ligetan

Datorren adrenalina,

Modaren parametroek

Eraikitako panpina,

Realiti-en ospean

Paperezko erregina,

Loturik mantendu gaitzan

Gure neurrira egina.

 

 

Langileek sorbaldetan

Duten prekarietatea,

Beltzean ordaintzen duten

Soldata baten partea,

Nagusiak esan dizu

“onartu ala atea”

Kontraturik gabe zaintzen

Dute Amatxo maitea.

Horrelakoetan zaila

Dugu libre izatea,

Banakoarentzat txarra,

Gizartearen kaltea,

Batzuetan nabarmena

Izaten dugu katea.

 

 

Graneleko alpistea

Gure bihotzen formola,

Garunaren motelgarri,

Mugitzen ez den odola.

Ekartzen digun tristura

Ezin badugu kontsola,

Ezina kanpora bota

Behar dugu hala-nola,

Sudurrean kokaina,

Ahotik behera alkohola,

Desfasa gaitezen guztiz,

Galdu dezagun kontrola,

Ordu batzuz ahazteko

Jarri diguten kaiola.

 

 

Ezin da munduan egon

Estatua baten eran,

Alpisteaz buiaturik

Belaki baten tankeran.

Kaiolak zuloak ditu,

Ez bada biltzen guregan,

Saia gaitezen ihesten

Lehendabiziko aukeran.

Nahiz norberak bildu behar

Duen zer jango, zer edan,

Nahiz erantzunik ez topa

Lehendabiziko galderan,

Gauza ederra da eta

Ikasi dezagun hegan.

Txoriak gara kaiolan