Coolpla berriak kulpa zaharrak –
Doinua: Abadiño San Blasetan
Julen Zelaietaren “Coolpla berriak” sortari erantzunez
Akusazio larriak,
euskal gazteoi jarriak,
coolpla berriak bai baina
ez dira kulpa berriak
Interpelatuta asko,
sentitu naiz ipso facto,
beraz esan nahi nituzke
orain nik pare bat facto
Ez arrazoi ta ez froga,
aspalditik dator moda:
euskara galtzen badugu
gazteon kulpa_izango da
Hitz, jerga ta esamolde;
kontuan hartu amore:
euskal mailegugintzak du
aurretik nahikoa lore
Cringe, bro, txungo ta zera
egin ei dugu atzera…
Aparkatu, pizza jan ta
joan futbola ikustera
Antiojuak ta silla,
erriyua ta kuadrilla…
“Euskaldun jatorra”, noski,
tronuan gera dadila
Zenbat irri ta iseka,
baina ipini arreta:
segun nork egiten duen
ez da berdin ikusten ta
Esan behar dizut barkatu,
ez duzu ta debora-tu,
ondo pentsatu behar da
zer ta nondik kritikatu
EE.UU., española,
McDonald’s ta Coca-Cola,
toki askotatik sartu
diezagukete gola
Kapitalaren logika
ez dugu gauza polita,
agian horri zuzendu
behar diogu kritika
Uler dadin erasoa:
ardia eta otsoa,
haren gosearentzako
jana da mundu osoa
Zuentzat zen rock-kultura,
guk TikToken diktadura,
globalizazioak jarri
digu guzti hau eskura
Sistemak bere barnean
du hori ezinbestean,
beraz errua ez jarri
gazte batzuen gainean
Euskañolaren kartzela,
euskara dela, ez dela,
uler dezagun zergatik
mintzatzen garen horrela
Errudunen bila itsu,
ta eman nahian guri su,
nagusitzen ari dira
zenbait troll ta skill issue
Beraz, entzuten duguna:
Sabinoren oihartzuna,
hizkuntzaren oinarrian
jarriaz purutasuna
Ta hortxe doa fun fact-a:
garbizaleen matraka…
Horrela euskarak ez du
inoiz egingo glow up-a
Algoritmoen bultzada
ta diglosiaren karga…
Aldatu behar duguna
zapalkuntzen erroa da
Zerbait asmatu artean
bila dezagun bakean
euskararen clean look-aren
ta suizidioaren artean
Gazte, zahar eta nerabe
denok euskararen alde,
museotik ateraz ta
erruak ezarri gabe
